இவ்வாறான கடவுள்களின் சிலைகள் பெரும்பாலும் கருங்கற்களில் தான் வடிக்கப்படுகின்றன. இதற்கு காரணம் என்ன தெரியுமா? பிரபஞ்சத்தினையே படைத்த இறைவனை பஞ்சபூதங்களும் அடங்கிய கருங்கற்களினால் உருவாக்கவேண்டுமென்பதாலேயே.... எவ்வாறு கருங்கல்லானது நீர்,நிலம்,காற்று,நெருப்பு ,ஆகாயம் என்பவற்றை உள்ளடக்குகின்றதென ஆச்சரியமாகவுள்ளதா?
நிலம் - கல்லும், மண்ணும் சேர்ந்தது.
நீர்; - நீர் என்பது பாறைகளிலிருந்து தான் ஊற்றெடுக்கின்றது. ஆகவே நீரின் குணமான குளிர்ச்சியினை பாறைகள் கொண்டுள்ளன.
காற்று – பாறையினுள் தேரை போன்ற உயிரினங்கள் வசிக்கின்றன. அவ்வாறான உயிரினங்கள் சுவாசிப்பதற்கு வளி அவசியம். பாறையினுள் வளி கிடைப்பதனாலேயே அவை அங்கு வசிக்க முடிகின்றது. எனவே கல்லினுள் காற்றடங்கியுள்ளது.
நெருப்பு – ஆதிகாலங்களில் கல்லையும் கல்லையும் உராய்வதன் மூலம் நெருப்புண்டாக்கப்பட்டது. ஆகவே தீயென்பது கல்லினுள் அடக்கமாகின்றது.
ஆகாயம் - ஆகாயம் என்பது சப்தங்களின் தொகுப்பு. கற்களானது சப்தங்களை உண்டாக்குகின்றன.எனவே ஆகாயத்துவமும் இதனுள் உறைந்துள்ளது.
இதனால் தான் அசையா தன்மை கொண்டதாயினும் பஞ்சபூதங்களையும் உள்ளடக்கிய கல்லினால் எம்மனைவரையும் ஆட்கொள்கின்ற இறைவனை வடிக்கின்றார்கள்.
கடவுள் என்பவன் இருக்கின்றானா? இல்லையா? என்பதைப்பற்றி ஆராய்ச்சிகள் ஒரு புறமும் கடவுளைக் கண்டவர்களுண்டா? அவனுக்கு வடிவங்களுண்டா என்கின்ற விரண்டாவாதங்களும் , கடவுள் என்பவன் எங்குமில்லை என்கின்ற நாத்திகவாதமும் . துன்பங்கள் வரும் போது “கடவுளே உனக்கு கண்ணில்லையா? நீயேன் சிலையாக இருக்கின்றாய் “ என்கின்ற புலம்பல்களும் இன்றும் தொடர்கின்றன....எவ்வாறாயினும் உலோக சக்தி,மனோ சக்தி, மந்திர சக்தி, எந்திர சக்தி, ஆத்ம சக்தி என உறைந்து பஞ்சபூதங்களால் உருவாக்கப்பட்டுள்ள விக்கிரங்களை வழிபட்டு “ அவனின்றி அணுவும் அசையாது” என அவன் காலடியில் சரணடைந்து விடுங்கள். அந்த நம்பிக்கையே உங்களை வாழ வைக்கும்.
மீராபாரதி
மட்டக்களப்பு
பிரசுரம் - தினகரன் 16.10.2012
No comments:
Post a Comment